El rei alvierte sobre la negación del otru "porque piensa, reza o vota distinto"

"Los premiaos recordáisnos col vuestru exemplu que, nel centru de cualquier discursu, tien que siguir tando la persona"

El rei alvirtió esti vienres, nel so discursu na ceremonia d’entrega de los Premios Princesa d’Asturies, de la "deshumanización" y cómo la historia alerta de los graves riesgos de la polarización, de la negación del otru poles sos convicciones o creencies, "porque piensa, reza o vota distinto".

Felipe VI esplicó cómo, nun mundu "globalizáu" de grandes magnitús y oportunidaes, ente avances tecnolóxicos "inimaxinables", la deshumanización ye un "riesgu llatente" y señaló cómo les horribles imáxenes de muerte y ruina que lleguen d’Oriente Próximu, Ucraína y d’África, ente otros llugares del mundu, "obliguen a una llamada incesante a la contención y a la humanidá".

Al entamu de la so intervención nel Teatru Campoamor d’Uviéu, el monarca destacó la emoción que supunxo pa él que dende agora seya la princesa Leonor, como presidenta d’honor de la Fundación Princesa d’Asturies, la que s’encargue de facer la reseña de los galardonaos colos premios, dempués de más de 40 años de tener "l’honor y la responsabilidá d’emponderar" a los premiaos nestes ceremonies.